Seminarda Şəki REM-in Landşaftşünaslıq və Ekoloji coğrafiya şöbəsinin əməkdaşları, İnçə-Zunud kənd tam orta məktəbin müəllim və şagirdləri iştirak ediblər.

Azərbaycanın ərazi bütövlüyü uğrunda canlarından keçən Vətən övladlarının xatirəsi yad edilib.

Tədbiri açan İnçə-Zunud kənd tam orta məktəbin direktoru Amil Əbdürəhmanov qonaqları salamlayıb, tədbirin təşkilində əməyi olan hər kəsə minnətdarlığını bildirib, sözü Şəki REM-in Ekoloji coğrafiya şöbəsinin rəhbəri, coğ.ü.f.d. Qafqaz Ağabalayevə verib. Qafqaz Ağabalayev Şəki REM əməkdaşlarını tədbir iştirakçılarına təqdim edib, tədbirin işinə uğur arzulayıb.

Sonra söz Ekoloji coğrafiya şöbəsinin elmi işçisi Xəzər Bəşirova verilib. O, "Yaşıl enerjinin ekoloji davamlılıq üzərindəki təsiri və gələcək inkişaf imkanları" mövzusunda çıxış edərək, şagirdlərə müasir dövrdə elektrik enerjisinə olan tələbat, bərpa olunmayan enerji ehtiyatlarının azalması və onların istehsalı prosesində təbiətə dəyən zərərin aradan qaldırılması məqsədilə alternativ enerji-bərpa olunan enerji qaynaqlarından istifadə edilməsinin zəruriliyi haqqında geniş məlumat verib.

Sonra Landşaftşünaslıq şöbəsinin elmi işçisi Murad Qəhrəmanov "Dəyişən iqlim, dəyişməyən laqeydlik" mövzusunda çıxış edib. Məruzəçi bəşəriyyəti narahat edən iqlim dəyişmələri, təbiətə, bioloji müxtəlifliyə olan antropogen təsirlər, ətraf-mühitin sənaye və məişət tullantıları ilə çirkləndirilməsinin qarşısının alınması məqsədilə ekoloji və iqtisadi sabitliyə nail olmaq kimi mühüm məsələlərə aydınlıq gətirib.

Daha sonra Şəki REM-in Ekoloji coğrafiya şöbəsinin əməkdaşı Elvin Qarayev "Şəki turizmini şərtləndirən amillər" adlı məruzəsində Şəkinin turizm baxımından mühüm əhəmiyyət kəsb etdiyini qeyd edib, Şəkinin turizm potensiallı məkanları haqqında məlumat verib.

Məruzəçi ekoloji tərbiyə işlərinin bünövrəsinin məktəbəqədər təhsil müəssisələri və orta məktəblərdən başladığını qeyd edib. O, ekoturizmi şərtləndirən əsas amillərin-bitkilərin, çayların, göllərin, şəlalələrin, parkların mühafizəsinin, həmçinin məktəbyanı sahələrdə bitkilərin becərilməsinin, qulluq göstərilməsinin, qorunmasının vacibliyini diqqətə çatdırıb.

Şəki REM-in Landşaftşünaslıq şöbəsinin rəhbəri, geol-min.ü.f.d. Hüseyn Mustafabəyli göstərilən dəstəyə görə İnçə-Zunud kənd tam orta məktəbin direktoruna minnətdarlığını bildirib, şagirdləri təbiətə biganə olmamağa, qayğı və diqqətlə yanaşmağa çağırıb.

Sonda Şəki REM-in 2024-cü il nəşrləri olan kitablar məktəbin kitabxanasına hədiyyə edilib, direktor Amil Əbdülrəhmanova Təşəkkürnamə təqdim edilib, xatirə fotoşəkilləri çəkilib.